சில சந்தேகங்களை சம்யுக்தா காதிற்கு கொண்டு வந்திருந்தார்கள் எம்பையர் ஊழியர்கள்.
சம்யுக்தா அதை பற்றிய சந்தேகத்தில் ஆழ்ந்திருக்க, “மேம். ஈவ்னிங் ஒரு முக்கியமான மீட்டிங் இருக்கு. இப்போதான் இன்வைட் பண்ணியிருக்காங்க” என்று சம்யுக்தாவின் உதவியாளர் அவசரமாக வந்தார்.
“என்ன மீட்டிங்?” என்று சம்யுக்தா பார்த்தவள், நெற்றியை நீவிவிட்டு கொண்டாள்.
அரசாங்கம் புதிதாக கொண்டு வந்துள்ள சட்டத்திற்கான கலந்தாய்வு கூட்டம். தொழில் அதிபர்கள் அதிகபேர் வருவார்கள்.
எம்பையர் இருப்பதால் சம்யுக்தாவும் கலந்து கொள்ள வேண்டிய கட்டாயம்.
“மேம். கவர்மெண்ட் கொடுத்திருக்கிற சில வழி காட்டு முறையில எம்பையரும் பாதிக்கப்படும். நீங்க டிஷ்கஷனில் இருக்கணும்” என்றார் உதவியாளர்.
குணா இல்லை! இந்த சில மாதங்களில் இரண்டு, மூன்று முறை சம்யுக்தா இது போன்ற கலந்தாய்வுக்கு சென்றிருக்கிறாள். குணா உடன் இருந்ததால் கடினமாக இல்லை. ஆனால் இன்று அப்படி இருக்க போவதில்லை என்று சம்யுக்தாவிற்கு புரிந்தது.
“மேம். நம்ம பக்கம் இருந்து ப்ரெசன்ட்டேஷன் கொடுக்க சொல்றாங்க” என்று உதவியாளர் பதட்டத்துடன் திரும்ப வந்தார்.
வேண்டுமென்றே செய்கிறார்கள், அந்த போர்டில் இருக்கும் ஆட்கள் யார், யார்? சம்யுக்தா புருவம் சுருங்கியது.
“மேம். ரெடி பண்ணிடலாமா?” என்று அவர் கேட்க,
“ஆல்ரெடி நாம அதைப்பத்தி நம்ம கம்பெனிஸ் கூட டிஸ்கஸ் பண்ணியிருக்கோம் தானே? அதை எடுத்துட்டு வாங்க” என்ற பெண் அதில் சில மாற்றத்தை செய்து, சிலதை புதிதாக சேர்த்தாள்.
“நேரம் ஆச்சு மேம். நாம தயாராகணும்” என்று உதவியாளர் சொல்ல,
“ம்ம்” என்று நேரம் பார்த்த சம்யுக்தா, “நீங்க இரண்டு பேர் கூட ரெடியாகிட்டு வந்துடுங்க” என்றவள் வீட்டை நோக்கி சென்றாள்.
வழியில் குருமூர்த்திக்கு அழைத்து, மீட்டிங் செல்ல வேண்டும் என்று மட்டும் சொன்னாள்.
“நமக்கு எப்போ சொன்னாங்க?” என்று நேராக பாயிண்டுக்கு வந்தார் குருமூர்த்தி.
“ப்பா. நாம ரெடியா தான் இருக்கோம், ஒன்னும் பிரச்சனையில்லை” என்றாள் மகள்.
“ம்ம்” என்ற குருமூர்த்திக்கு இந்த அரசியல் பெரிய தலைவலியை கொடுத்தது.
அவர் நேருக்கு நேர் சண்டை போடுவது போல் இது இல்லையே!
தாக்குதல் உண்டு. ஆனால் பலது முதுகுக்கு பின்னால் தான் நடக்கிறது.
யார், எவர் என்று கண்டுபிடித்து சண்டையிட்டு கொண்டே இருக்க முடியுமா?
“இங்க இப்படித்தான்ப்பா, என்னால் ஹாண்டில் பண்ண முடியும்ன்னு தான் நினைக்கிறேன்” என்றாள் சம்யுக்தா.
இனி பின்னால் போக முடியுமா? எம்பையர் கட்டியாகிவிட்டது. விரிவாக்கத்திற்காக அடுத்த இரண்டு கட்டிடமும் கூட எழும்பி கொண்டிருக்கிறது. தொடர்ந்து நடத்த தான் வேண்டும்.
“நீங்க நிலையா நிக்கிற வரைக்கும் இப்படி தான் நடக்கும். அடிச்சு ஆடணும். உன்கிட்ட கொஞ்சம் தயக்கம் தெரிஞ்சாலும் ஏறி மிதிச்சிடுவாங்க” என்றார் சிவப்பிரகாசம்.
ஆம் அவர்தான் சம்யுக்தாவின் ஆலோசகர்!
தேவை என்றால் எம்பையருக்கு அவர்தான் வருகிறார்.
சம்யுக்தா காரில் சென்று கொண்டிருக்கும் போது சிவப்பிரகாசம் அழைத்தவர், “என்னமா? ப்ரசன்டேஷன் கொடுக்க சொல்றாங்களா?” என்று கேட்டார்
“ஆமா சார்” என்று சம்யுக்தா சோர்வாக சொல்ல,
“என்ன பண்ணலாம்?” என்று கேட்டார் சிவப்பிரகாசம்.
“என்ன போய் பண்றது சார்? கொடுத்து தானே ஆகணும்” என்றாள் சலிப்பாக.
“ஹாஹா. அப்படியெந்த கட்டாயமும் இல்லை பொண்ணே! நீ சொல்லு, மீட்டிங்கையே கேன்சல் பண்ணிடவா?” என்று கேட்டார் சிவப்பிரகாசம்.
“சார். வேணாம், வேணாம். நான் ரெடி பண்ணிட்டேன்” என்றாள் சம்யுக்தா.
“முன்ன பின்ன இருக்கும் அட்ஜஸ்ட் பண்ணித்தான் பிஸ்னஸ் நடத்தணும்ன்னு நீங்க தானே சொன்னீங்க? இப்போ நீங்களே இப்படி கேட்கிறீங்க”
“அதுக்காக இவங்க அதிகாரத்துக்கு ஆட முடியுமா என்ன? அதென்ன இவங்க அப்பன் வீட்டு சொத்தா? டிஸ்கஷன் தானே? என்னமோ சட்டத்ததையே மாத்தி எழுத போற மாதிரி ஓவரா போறாங்க”
“எதுக்கு இப்போ இவ்வளவு கோவம் சார்? ப்ரேசெண்டேஷன் தானே, கொடுத்துடலாம்”
“அது அப்படி இல்லை. சின்ன பொண்ணு தானேன்னு உன்கிட்ட ஆடி பார்க்க துடிக்கிறாங்க. எங்க வந்து யார்கிட்ட எதை செய்றதுன்னு அவங்களுக்குக்கு தெரிய வேண்டாம், இன்னைக்கு தெரிய வைச்சிடுறேன். நானும் மீட்டிங் வரேன். வா. பார்த்துக்கலாம்” என்று வைத்துவிட்டார் சிவப்பிரகாசம்.
சம்யுக்தாவிற்கு மெலிதான புன்னகை.
தனிமனிதனாக சிவபிராகசம் மீது பெண்ணுக்கு பெரிதான அபிப்ராயம் இருந்தது இல்லை. ஆனால் ஒரு பிஸ்னஸ் மேனாக அறிமுகம் ஆனபின் மனிதர் வேறு மாதிரி தெரிகிறார்.
எக்கச்சக்க மரியாதை, மதிப்பு அவர் மேல் வந்திருந்தது.
பயங்கர மூளைக்காரர்! சம்யுக்தா அடிக்கடி மெச்சி கொள்கிறாள்.
மின்னலாக அவரின் ராஜா மகன் பெண்ணுக்குள் வெட்டி சென்றான்.
மூச்சடைப்பது போல் இருக்க, கார் கண்ணாடியை இறக்கி விட்டு கொண்டாள் சம்யுக்தா.
“என்ன கண்ணு இந்த நேரத்தில?” என்று பாட்டி கேட்க, அவருக்கு விஷயத்தை சொன்னபடி தயாராக சென்றாள் சம்யுக்தா.
புடவை அணிந்து கொண்டவள், அதற்கு தக்கன மிதமான அலங்காரம், ஆபரணத்துடன் கண்ணாடியை பார்த்து திருப்தி பட்டு கொண்டாள்.
உயர்தர லெனின் புடவையை, இரண்டாக மடித்து முந்தி எடுத்து கொண்டவள், ஹீல்ஸ் அணிந்தபடி காருக்கு வந்தாள்.
மிகப்பெரிய நட்சத்திர விடுதியில் சம்யுக்தா கார் நுழைந்தது.
அவளின் உதவியாளர்கள் இருவர் வந்து காத்திருக்க, அவர்களுடன் கலந்தாய்வு நடக்கும் ஹாலுக்கு சென்றாள் சம்யுக்தா.
அறிமுகமான சிலரிடம் பேசியபடி அவளுக்கான இடத்தில் அமர்ந்தாள் பெண்.
உபசரிக்க கொடுக்கப்பட்டதில் தண்ணீர் மட்டும் எடுத்து கொண்டவள், சரியான நேரத்தில் வந்திருக்க, கலந்தாய்வும் ஆரம்பமானது.
சர்வாச்சார்யா குரூப் ஆப் கம்பெனி சார்பில் பலர் வந்திருக்க, சிவப்பிரகாசம் காணவில்லை.
சம்யுக்தா கண்கள் மேலாக அவரை தேடியது. இதுக்கு அப்புறம் வருவார் போல.
சம்யுக்தா முறையும் வர, ப்ரசெண்டேஷன் கொடுக்க சென்றார் உதவியாளர்.
“நீங்க ஏன்? சம்யுக்தா மேடமே கொடுக்கட்டும். ப்ளீஸ் மேம் வாங்க” என்றார் ஒருவர் மேடையில் இருந்தபடி.
உதவியாளர்கள் தான் அதிகம் கொடுத்ததை கவனித்திருந்த சம்யுக்தா, நொடி மூச்சிழுத்து விட்டு கொண்டாள்.
