கொஞ்சும் காதல் சாரல் 23 1

கொஞ்சும் காதல் சாரல் -23

அத்தியாயம் -23

சுவிசர்லாந்தின் குளிரில் படத்தின் நாயகனுக்கு காய்ச்சல் வந்து விட்டது. மருத்துவமனையில் காண்பித்த போது ஏதோ தொற்று இருப்பதாக சொல்லி அட்மிட் செய்து விட்டனர். 

இந்தப் படத்தில் இரண்டு காதநாயகர்கள், ஒரு கதாநாயகி. 

இங்கு காட்சியாக்க வேண்டிய பாடலின் படப்பிடிப்பை முடித்து விட்டு படத்தின் மற்றொரு கதாநாயகனுக்கான பாடலை படமாக்க வேறு நாடு செல்கிறார்கள். 

நாயகனுக்கு ஏற்பட்ட உடல்நலக் குறைவால் பயணத் திட்டத்தை மாற்ற வேண்டிய கட்டாயம். ஏகப்பட்ட பொருட்செலவு மற்றும் நேர விரயம் ஆகும் அபாயம். 

இதை தவிர்க்க பங்கஜிடம் ஒரு யோசனை இருந்தது. ஏற்கனவே படமாக்க பட்டிருந்த காட்சிகளை அப்படியே வைத்துக்கொண்டு மிச்சத்தை டூப் போட்டு எடுக்கலாம் என்றார். 

படத்தின் முக்கிய பாடல் காட்சி இது. கதைப்படி நாயகனும் நாயகியும் உயிருக்குயிரான காதலர்கள், நாயகிக்கு திரைப்படத்தில் நடிக்கும் வாய்ப்பு வருகிறது, ஒரு பாடலில் நாயகி ஹீரோவுடன் நெருக்கமான காட்சிகளில் நடிக்க, அதை வைத்து காதலர்களுக்குள் பிரச்சனையாகி பிரிவு வருகிறது. 

ஆகவே இந்த பாடலில் எந்த சமரசமும் செய்து கொள்ள இயக்குனர் தயாராக இல்லை. 

சில வருடங்களுக்கு முன் ஒரு நடிகர் இப்படித்தான் வெளிநாட்டு படப் பிடிப்பில் இருந்த போது  அவரது தந்தை இறந்து விட, உடனே நாடு திரும்பி விட்டார். டூப் வைத்து பாடலை படமாக்கி எடிட்டிங் பணியின் போது சரி செய்து கொடுத்திருக்கிறார் பங்கஜ். அதைப் போலவே இப்போதும் செய்யலாம் என்றார் அவர். 

அதைக் கேட்ட இயக்குனருக்கு ஆச்சர்யம், ஏனென்றால் அந்த பாடல் அத்தனை பிரபலம், நாயகனுக்கு பதில் வேறொருவன் ஆடியதாக பங்கஜ் குறிப்பிட்டிருந்த காட்சிகளை இப்போது பார்த்தாலும் டூப் ஆடியிருப்பதை யாராலும் கண்டு பிடிக்கவே முடியாது. 

பங்கஜின் மீது நம்பிக்கை வைத்த இயக்குனர், “ஹீரோ போலவே பெர்ஃபெக்ட் டூப் வேணுமே மாஸ்டர்?” என்றார். 

ஜீவாவின் பெயரை கூறினார் பங்கஜ். 

அவரின் கையை பற்றிக் கொண்ட இயக்குனர், “சூப்பர் மாஸ்டர், ரெண்டு பேருக்கும் ஒரே மாதிரி ஸ்கின் டோன், பிஸிக் இருக்கு. கண்டிப்பா ஒர்க் அவுட் ஆகும். நல்ல படியா முடிச்சு கொடுங்க மாஸ்டர்” என சொல்லி விட்டார். 

பங்கஜ் உடனே ஜீவாவிடம் பேசினார். ஏற்கனவே நடனம் அமைக்க பட்டிருந்ததால் காட்சிகள் எப்படி இருக்கும் என ஜீவாவுக்கு நன்றாக தெரியும், காய்ச்சல் வந்த நாயகனுடன் அந்த நெருக்கமான காட்சிகள் இன்னும் எடுக்க பட்டிருக்கவில்லை. 

மிது திட்டுவாள் என்பதை விட ஜீவாவுக்கே அப்படி நடிக்க இலகுவாக இருக்கும் போல தோன்றவில்லை. ஆகவே மறுத்து விட்டான். 

இந்த இயக்குனர் வளர்ந்து வரும் துடிப்பான இயக்குனர், ஓரிரு வருடங்களில் இவர்தான் முன்னணி இயக்குனராக இருக்க போகிறார், இதை நீ செய்து கொடு, எதிர்காலத்தில் இவரின் அடுத்தடுத்த படங்களில் உனக்கு நடன இயக்குனராக வாய்ப்பு வரும் என்றார் பங்கஜ். 

“நான் உங்ககிட்ட சேர்ந்தே ரெண்டு மாசம்தான் ஆகுது, அவ்ளோ சீக்கிரம் மாஸ்டரா சான்ஸ் கிடைக்குமா?”

“ஃப்யூச்சர்ல சொன்னேன், நாளைக்கேன்னு சொல்லலை. ரெண்டு வருஷத்துக்கு அப்புறம்னாலும் இந்த இண்டஸ்ட்ரில எல்லாரையும் நயந்தாதான் காரியம் நடக்கும்”

“நீங்க என்ன சொன்னாலும் ஒத்துக்க முடியாது ஸார், மிதுவுக்கு தெரிஞ்சா என்னை ஹாஸ்பிடல்ல அட்மிட் ஆகுற அளவுக்கு வச்சு செஞ்சிடுவா” என்றான் ஜீவா. 

ஜீவாவின் முன்னேற்றத்துகாக எதையும் செய்யுங்கள், நான் சண்டை போட்டாலும் விரைவில் சமாதானம் ஆகி விடுவேன் என தன்னிடம் மிது சொன்னதை சொன்னார் பங்கஜ். 

“யாரு… மிது சொன்னாளா அப்டி? லேட் நைட் வீட்டுக்கு போறது பத்தி சொல்லியிருப்பா” 

“எவன்டா நீ? மிது என்கிட்டதான் பேசிச்சு,  என்ன பேசிச்சுன்னு எனக்கு தெரியாதா? நல்ல சான்சை மிஸ் பண்ணிடாத” 

“ஏற்கனவே கம்போஸ் பண்ணின ஸ்டெப்ஸ்தானே? அந்த க்ளோஸ் சீன்ஸ்லாம்… ம்ஹூம்… என்னால முடியவே முடியாது”

“மத்தவங்க அப்டி சொல்லலாம், நீ சொல்றது வேடிக்கையா இருக்கு”

“அட்லீஸ்ட் அவ்ளோ க்ளோசா இல்லைனா கூட நான் யோசிச்சிருப்பேன்”

 “இந்த சாங் இந்த மூவிக்கு எவ்ளோ இம்பார்ட்டண்ட்னு உனக்கு தெரியாதா ஜீவா?” 

“எல்லாத்துக்கும் மேல மிது  எனக்கு முக்கியம், அவங்க வீட்ல எங்க கல்யாணத்தை எப்படி ஒத்துப்பாங்கனு கவலைல இருக்கோம், இந்த சாங்ல நான்தான் ஆடியிருக்கேன்னு தெரிஞ்சா அவ்ளோதான்”

“படம் பார்க்கிறவங்களுக்கு நீதான்னு எப்படி தெரியும்? நீ ஹீரோவோட டூப், ஏற்கனவே ஹீரோ வச்சு எடுத்த சீன்ஸ் வச்சு அந்த ஹீரோதான் ஆடுறான்னு எல்லாரையும் நம்ப வைக்கிறது என் பொறுப்பு” 

கையெடுத்து கும்பிட்ட ஜீவா, “விட்ருங்க ஸார், மிது ரொம்ப சென்சிடிவ், ரிஸ்க் எடுக்க நான் ரெடியில்லை” என சொல்லி விட்டான். 

உடனே மறுக்காதே, யோசித்து சொல் என்ற பங்கஜ் வெளியேறி விட்டார். 

சற்று நேரத்தில் இயக்குனரே வந்து ஜீவாவிடம் பேசினார். படப்பிடிப்பு நடக்கா விட்டால் எவ்வளவு இழப்பு ஏற்படும் என்பதை சொன்னார், கடன் வாங்கி படம் எடுக்கும் தயாரிப்பாளர் பாவம் என்றார். வேறு ஆளை தேர்வு செய்ய ஜீவா சொன்ன யோசனையை ஏற்க மறுத்தார். அவனை தவிர பொருத்தமானவன் தற்போது யாருமே கைவசம் இல்லை என்றார். 

மருத்துமனையிலிருந்த ஹீரோ கைப்பேசியில் அழைத்து, “இதுதான் என் ஃபர்ஸ்ட் மூவி, நீங்க நோ சொன்னா உடம்பு முடியலைன்னாலும் பரவாயில்லைனு நான்தான் வந்து நடிச்சு கொடுக்கணும். ப்ளீஸ் ஹெல்ப் பண்ணுங்க ஜீவா” என கெஞ்சினான். 

மனமில்லை என்றாலும் மற்றவர்களுக்காக கவலை கொண்ட ஜீவா, மிதுவிடம் கேட்கிறேன், அவள் சரியென்றால் எனக்கும் சரி என்றான். 

உடனே அவளிடம் கேட்க சொல்லி படக்குழு வற்புறுத்த, மிதுவுக்கு அழைத்தான் ஜீவா. கோயிலில் இருந்த மிது ஜீவாவின் தொடர் அழைப்புகளை ஏற்கவில்லை, வீடு வந்த பின் அன்று நடந்ததை அவனிடம் சொல்லி  அழுது புலம்பினாள். 

இந்த நேரத்தில் தான் சொல்லும் விஷயம் அவளை மேலும் பாதிக்கும் என நினைத்து சொல்லாமல் விட்டான் ஜீவா. 

மிதுவுக்கு இதை சொல்லவே தேவையில்லை என்றார் பங்கஜ். ‘ஆமாம்’ என்றனர் குழுவிலிருந்த மற்றவர்கள். குழம்பிப் போனான் ஜீவா. 

எல்லா பக்கத்திலிருந்தும் தொடர்ந்து கொடுக்கப் பட்ட அழுத்தத்தால் சம்மதம் சொல்லி விட்டான்.

மிதுவிடம் பேசினால் இதை சொல்லாமல் இருக்க முடியாது என்பதால், படப்பிடிப்பு நடக்கும் இடத்தில் சிக்னல் கிடைக்காது, சில நாட்கள் கழித்துதான் உன்னிடம் பேசுவேன் என சொல்லியிருந்தான் ஜீவா. 

பங்கஜின் டான்ஸ் ஸ்டூடியோவில்  ஜீவாவை திட்டிய ஷாராதான் கதாநாயகி.

இருவருக்கும் புரிதல் வந்து ஒத்து போகட்டும் என  முதலில் அத்தனை நெருக்கமான காட்சிகளை எடுக்கவில்லை பங்கஜ். 

அடுத்த நாள்தான் ஜீவாவுக்கு சோதனை. மேலாடை இன்றி வெறும் கால் சராய் மட்டும்தான் ஜீவாவின்  ஆடை. கவர்ச்சியான உடையணிந்திருந்த ஷாராவுடன் நெருக்கமான நடன காட்சிகள். 

மிகவும் அசௌகர்யமாக  உணர்ந்த ஜீவா டேக் வாங்கிக் கொண்டே இருந்தான். 

“நீ சரியா செய்யலைனா திரும்ப திரும்ப ஆடிட்டே இருக்க வேண்டியதுதான். வெறும் டான்ஸ்தான் ஜீவா, இது உன் வேலை, அதை மனசுல வச்சு ஃபிரீயா பண்ணு” என்றார் பங்கஜ். 

“ஆக்ட்டிங்தானே ஜீவா? என்னை பொண்ணா நினைக்காம பொம்மையா நினைச்சுக்க” என்ற ஷாரா, அவன் காதில், “இல்லைனா உனக்கு பிடிச்ச பொண்ணோட ஆடுறதா இமாஜின் பண்ணிக்க” என யோசனை சொன்னாள். 

“யாரு எனக்கு பிடிச்ச பொண்ணோட இப்படியா?” எனக் கேட்ட ஜீவா விழிக்க, “அதுவும் கரெக்ட்தான், அவங்களோட ஃபைட் சீக்வன்ஸ்தான் நீ இமாஜின் பண்ணலாம்” என கிண்டல் செய்தாள் ஷாரா. 

மிதுவிடம் பேசாமல் இருப்பது, அவளுக்கு தெரியாமல் இப்படி நடிப்பது என மனதளவில் சோர்ந்து போயிருந்தவனால் நடனத்தில் கவனம் வைக்க முடியவில்லை. 

ஜீவா மிகவும் சொதப்புகிறான் எனக்கு திருப்தியே இல்லை என கடுப்படித்தார் இயக்குனர். 

ஜீவாவை சற்று நேரம் தனியாக விட சொல்லி விட்டார் பங்கஜ். 

நடனக் குழுவிலிருந்த இருவர் அவனிடம் சென்றனர். விமான நிலையத்தில் ஜீவா மிதுவுக்கு முத்தமிட்டு விடை பெற்ற காட்சியை அவர்களில் ஒருவன் படாமக்கி வைத்திருந்தான். 

“உன் வைஃபை பிரிஞ்சு ரொம்ப நாள் ஓட்ட மாட்ட, கண்டிப்பா ஒரு நாள் ரொம்ப அப்செட் ஆவேன்னு தெரியும், அப்ப இத உனக்கு காட்டலாம்னு நினைச்சோம், இதை பார்த்து பூஸ்ட் ஏத்திக்கிட்டு வந்து ஆடு” என்றான் அவன்.